MIDANG TE TAN NUN I HMANG ANG U

Pathian thu zirmi (Theologian) ka ni lova, Pathian thu ‘dik lo thei lo-ah erawh chuan midangte tana malsawmna ni turin’ thu min pe tih erawh ka chiang hle. Khawvel ṭhang chho mek, hmasawnna a kal mup mup lai hian a ngai renga kan awm chuan kan hnufum dawn tih erawh kan in hre reng ang a. Hmasawn tura ke kan pen hi kan tih makmawh, kristiante nun inghahna a ni. Chumi anih avanga nun tlu chhia leh boral an tam em avang chuan fimkhur  a ngai a ni.

Khawvelah kan awm avangin khawvel thil, hmuh theih changkanna in a hrinte hi kan thlauh thla thiang bik lo a, kan tana siam a ni ve tho si a. Amah erawhchu, chaw tak, dangral mai mai lo tur Thlarau lam thil hlamchhiah erawh sual lian tak a ni. A in-Balance-a nun hi kan hman loh chuan boralna khurah kan lut mai dawn a, boral lo tura kan beih erawh a ngai a ni. Mi hausa leh mi lian te nundan hi kan thlir a, chuti anga awm chu kan chak fo ṭhin, chute anga kan beih dan erawh a in ang lo. Intlansiakna kan beih lai a, dan zawm tur hriat loh chuan hnawl a ni ṭhin.

Nun hi eng nge a nih a, eng anga hun hmang tur nge kan nih tih Bible-in min hrilh a, Engmah lo mai, chhum reilo te lo lang a, ral leh ang mai a ni tiin a sawi a. Nimahsela, chu hun tawi te-ah chuan âm taka kan vanglai chen hi a phal a ni. Chumi hnuah chuan rorelna dik, hleih bik nei lo, kan thil tih lawmman leh hremna a awm dawn avangin uluk taka hman erawh a ngai thung. Reilo te dam thlak hlelh vangin sum tam tak kan seng a, hun kan hmang a. Chu mi atan chuan sum leh kan neih hlu pawh kan seng ral hreh lo a ni. Pathian chu rinna a hmuh theih a nih avangin khawvel thil kan buaipui laiin hmuh a har hle a, hriat erawh hriat reng tur  a ni.

Nitina kan khawsak ngaihtuahna-ah hian (Thlarau lam thil erawh dah ṭha hrih ila) eng nge pawimawh ber a? Eng nge kan tih hmasak tur tih ngaihtuah ila? Sum leh pai thawh chhuah ngawt hi a ni lo a. Sum leh pai chu mihring nun nawm nan leh hlim nan  a ni. Chu mihringa chu amah ngawta a awm theih loh avang te, ṭhenawm khawveng, khawtlang leh kohhran tel lo a, khawsa thei lo a ni. Chu vangin Sum leh pai duhamna hian chin lem a nei lo a. Ngaihsak loh tur te, ngaihtuah loh tur te kan ngaihtuah phah ṭhin a, midang hmakhua kan ngai lo fo ṭhin  a ni. Kan damkhawchhuah nana hna kan thawh hian Pathian duhzawng kan ti a, Kristian nun a ni, Chutih laia midang te chhiatna leh thil diklo, kan inthiam chawp thil kan ti tel ṭhin a nih chuan Pathian duh loh zawng, A hrem tur , dan bawhchhia kan lo ni reng si a.

Mahni maia khawsak thei lo, chhungkua, khawtlang leh ram avanga mihring nun famkim ṭhin hian a chenpui, a hnampui a dip ral fo ṭhin. Midang te ngaihthahna lian tak a hring ṭhin. Midangte ngaihthah hman kan ni tawh lo a, mahni tana thawk a, midang te chhawr theih a awm hi kan tih tur  a ni. Chuti lo a mahnia pum bilh vek tumna hian sual lian takah min hruai lut fo.  Inthiam chawp vang emaw inngaihtuah chawp avanga kan ti lui zel a nih chuan hremna kan pumpelh hauh lovang.

Sum thawhchhuah leh kan nitin hnathawhna piah lamah hian kan khawsak phung leh, kan ei bar hmuh dan-ah te hian mi ten engtin nge min sawi ṭhin a, kan hlimna aiin midangte lungngaihna a tam lo maw? I ṭhenawm khawveng leh I hnathawhpui, ei bar dap puite hian engtin nge an ngaih che? Mahni hmasial rana tha thawh ṭhin, ṭawngkam seng ṭhin nia an hriat che chuan I boral thuk tawh viau a ang. Hemi piah lamah hian I chenpui, I hun hman pui leh I ṭhenrual te zinga I awmin an danglamna, an lungaihna leh an hlimna hi an awmdan aṭangin I chhiar thei em? Beidawng leh inchhira an awm chang te, lawmna leh hlimna an neih chang te hian an chetzia-ah I man thei em? I thei lo anih chuan midangte tan I nun I seng tlem hle a ni ang a, mahni chauh in ngaituah zui ṭhin I ni ngei ang. Chung an awmdan inthlak thleng ṭhin pawh hre tura I ngaihtuahna I seng ngai lo anih chuan Pathian thu hi zawma nunpui har I ti ve ngawt ang.

Ngaihtuah la, ngaihven rawh. I hnathawh tibuai kher lovin mi nun, an hun hman dan te, an chetzia te hi thlir reng la ngaihven teh. Ṭawngkam aiin Pathian thu hrilh hi a hlawk zawk asin. Lungngaite lungngaihpui a, lawm te ṭahpui hian Pathian hmel a tifiah a, an tana malsawm nihna a ni. Ṭawngkam chauha hmangaih, thil tih tel lo hian kori a tu lo hle, thil tih ngawt pawh a sawng saw hlawt lo. Engkimah ṭawngṭai leh dil chunga midangte ngaihsak hi kan bat a ni a. Pathian duhdan pawh a ni. Hmangaihna te, ngilneihna te, ngaihsakna te hi Pathian thilthlawn pek a ni a, a hluin anih dan tur ang taka hman hi kan mawh a ni. Hmangaihna nei chung chuan mite ngaihthah erawh a theih lo a,  hmangaihna chu thil tihin a zui ṭhin ang hian ngaihsakna chuan hmangaihna, khawngaihna te a hring ang.

Ṭawngkam ngawta Pathian rin emaw Pathian thu sawi hi a tawk zo ta lo. Thil tih telin Pathian thu I hril ang u. Thiltih ngawta Pathian thu hrilh pawhin midangte hmangaihna a tel loh chuan thawhrimna a thlawn mai ṭhin a. Midangte nunah engmah a thawk ngai lo, Chapona siam tu mai a lo ni ṭhin. Chu vangin sual ngaih-hna-thiam lova, sual haw tak chungin midangte tan kan hun tam zawk hi seng ila, midang te ngaihsak ila nun ning hi an tlem sawt ang. Miten kan nunah hmuh tur an nei ang. I kawm ngaih tak tak te, I chenpui ten in nunah ei tur an hmuh theih lohna chhan chu I khawsak dan in a zir loh vang a ni a. I khawsak dan siam ṭha in midangte ngaihsak la, an tana hun, tha leh zung sen hreh suh. An nun inthlak theng ṭhin hre thei tur khawpin ngaihsak la, khawvel nuam tak kan siam thei ang.

                Pathian thu laimu ber chu midangte tana hnathawh a, fahrah, riangvai, chan hai leh hnawl hnu te hmangaih tak leh ngaihsakna nen, an ṭhatna tura hnathawh hi a ni. Chumi anih rual chuan taima takin kan tan kan thawk ang a, a hlawkna kan tel chuan mi dangte zar zo theih turin kan luang chhuak ang. Sum leh pai pek a, hrilha zirtir hi a tawk zo tawh lo. Ngaihsakna thinlung nena rawngbawlna lo hi chuan mite nunah thu a sawi thuk thei lo a ni.

THE JAR OF LIFE –  Stones, Pebbles and Sand

(MASON TEHKHIN THU)

Zofa H Chhangte

(  Mizorama Staff Nurse ṭhenkhat tan thla 3 chhung chhawng thumin Training a awm mek a. Nursing School Lunglei chuan alo dawng sawng a.  Kei teh lul hi Personal Management, Staff Development chungchang leh hnathawhna kaihhnawih chungchangah hun hmang turin min sawm ve a. He Mason tehkhinthu hi hun a heh loh zawk nan Mizo ṭawng ngeia dah hi ṭha-in ka hria a, Ka han letling/her rem nghal mai a ni e.) 

Ni khat chu France rama Public Management zirna sang taka Professor upa tawh tak hi America rama Company lian leh hlawhtling tak tak 15 aiawha kal Executive Manager-te hmaa “Efficient Time Management tih thusawi (lecture) turin an sawm a. He ni hi chhawng nga a ṭhenin, Professor hi Darkar khat chhunga thusawina hun siam sak a ni bawk.

Managers ṭha thlankhawm ṭhah hmaa a din lai chuan, a thusawi kamkhat pawh hmaih lova chhinchhiah tumin an lo inring a. Chu professor chuan muang changa hawi kualin, mimal tin mit a en chhuah vek hnu-ah chuan “Enchhinna kan nei dawn a ni” tiin a sawi a.

A hmaa dawhkan hnuai aṭang chuan Darthlalang bur lian tak hi a phawrh chhuak a, Muang chang leh fimkhur tak hian dawhkanah chuan a dah a. Chumi hnu-ah chuan Dawhkan hnuai aṭang vek chuan lung dahkhawm, ipte-a fun chu a phawrh chhuak leh a. Chung lung te chu Tennis ball ang tiat vela lian an ni a.  Lung te chu a mal malin a phawrh chhuak a, Bur chhungah chuan a dah zel a. A dah zo vek a. Chu bur melh pah chuan manager-te hmuh theih turin a lek kang a. Professor chuan “Bur hi a khat em?” tiin a zawt a. Manager-te chuan “Aw” tiin an chhang a.

Professor chu ngawi deuh rengin, “Tak tak maw?” tiin

A hnu-ah chuan dawhkan hnuai aṭang vek chuan ṭiaulung, Ipte khata fun chu a phawrh leh a. Fimkhur tak chungin Professor chuan ṭiaulung te chu  bur chhungah chuan uluk leh dim takin a chhung khat leh a. Lung lian zawk kara an awm theih hun thleng chuan a thing a. Professor chuan ngaithlatute melh pah chuan “Bur hi a khat em?” tiin a zawt nawn leh a.

Hetih lai hian Manager-te chuan Professor thil entir tum chu hrethiam nia inhria-in. Mi pakhat hian “Khat lo” tiin alo chhang a .

“A dik” tiin Professor chuan a chhang a. Ipte pakhat, ṭiauvuta khat chu la chhuak lehin, Bur chhungah chuan fimkhur takin a chhung leh a. ṭiauvut chuan Lung lian leh ṭiaulungte inkara hmun awl chu a hnawh khat ta vek a.

Professor chuan a zawt nawn lehin “Bur hi a khat tawh em?” tiin.  Chutah chuan chiang lo taka ring chung chuan “” Aih”tiin an chhang rual thup hlawm a.

“A dik” tiin professor chuan a sawi a.  Kalkhawmte rin ang ngei chuan, Professor chuan dawhkan chunga an tui chhawp chu la chhuakin, Bur chu a khah hma chuan a chhung khat ta vek a. Professor chuan bur chawikanga melh pahin a zawt nawn leh a, “Eng thudik nge he enchhinna aṭang hian kan hmuhchhuah tak?” tiin a zawt a.

Professor ngaihtuahn, thupui rilru ang pu chungin, manager pakhat chuan rang tak hian, “Eng anga hun bituk tam pawh lo awm se, kan tumna kan tihsan chuan Meeting leh tih tur hrang hrang pawh hi kan ti thei tih kan zir chhuak a ni” tiin.

Professor chuan “A ni lo” tiin a chhang a. He enchhina aṭanga thudik dik tak kan hmuhchhuah zawk chu “Bur chhungah hian lung lian ber kan dah luh hmasak loh chuan, a chhungah hian kan dah lut kim vek thei ngai dawn lo a ni” tiin a sawi a.

Professor thusawi pawimawh leh ṭangkai tak ngaihtuah avang chuan Hall chhung chu a reh tlawk tlawk a.

Professot upa tak chuan a sawizawm leh a, “I nunah khan lung lian chu eng te nge? Hriselna nge? Chhungkua nge? Ṭhiante nge? I thil tum zawk? I chak zawng tih em ni zawk? Chhan leh tum mumal taka I beih zawk kha em ni? I tana hun ṭha neih hi em ni?

Kan hriat reng tur chu kan nuna lung lian ber berte hi tih hmasak loh chuan a vaiin kan hmaih thei a ni.  Kan nuna thil te tak te te (ṭiaulung leh ṭiauvut te) kan dah pawimawh hmasak chuan  kan nunah hian  thil te tham tak tak te seng luh a ni ang a. Thil te tham leh pawimawh lo chu hnut chhiah thiam hi kan nun zelna atana thil pawimawh tak a ni. Nangmah leh nangmah kha inzawh theihnghilh suh ang che.

I nuna lung lian kha eng nge ni? Chumi I hriat chian tawh hunah chuan, I nuna bur ruakah khan dah luh hmasak theihnghilh suh ang che.

Lunglian chu ngaihtuah hmasa la – Thil pawimawh tak a ni si a. A pawimawh dan indawtin remfel la.  A dang zawng chu ṭiaulung leh ṭiauvut-ah I ngai dawn nia. Ṭiaulung leh ṭiauvut bur chhunga I chhung lut hmasa a nih chuan Lungte/lian zawk tan hmun ruak a awm ngai dawn lo a ni.

Chuti ang chu I nun dan nen a in-ang a. I theihna leh chakna kha thil te tham zawka I hmang a nih chuan I nuna thil pawimawh ber tan hmun I nei ngai dawn lo a ni.

I nuna harsatna te kha dah pawimawh hmasa la. Naupangte nena infiam nan hun nei la. I kawppui kha chawhlui kil tura hruai leh lenchhuahpui turin hun nei la. I hmangaihte tana inkawmna hun ṭha nei la. Hnathawhna hun ṭha te, In tihfaina hun ṭha te, Chawhlui kilhona hun ṭha te chu a awm mai dawn  a ni.

A chang chuan kan nuna thil pawimawh lote hian min tibuai fo a. Kan hun an la hek  ṭhin a, thil pawimawh aṭang hian min tibuai fo ṭhin. Ka fuih duhna che u leh, nangmahni inzawt ula tia ka sawi duh chu, “ I nun kha ṭiaulung leh ṭiauvut a khat nge a nih a, Lunga khat” tih hi a ni.

<<He jar of Life hi Internet leh  ṭhenkhata ziah pawh a inang lo nual a, a remchang ber chu behchhanah hmangin ka han letling tawp mai a ni a. Sawiho atana hman a, fiah chi a ni a. A ṭobul leh a nihphungte hi ziah hleih theih a nih loh avangin ka dah ta lo mai>>
< Stones= lungte; pebbles= ṭiaulkung, Sand = ṭiauvut tiin ka hmang ve hmiah bawk>

ZU NGAWLVEI HLA PHUAH KHA

(Wine into Water- T. Graham Brown)

(Khatia ka room kawngkhara tap zawih zawiha an lo len khan, a pasal zu ngawlveina avanga chhungkua-in harsatna an tawh tamzia min hrilh a, ngun takin ka ngaithla emaw ka tih laiin thildang daih ka lo ngaihtuah a. Chu ka ngaihtuahna-ah chuan Turn Back Wine Into Water tih hla hi ka lo sakpui mawlh mawlh a. Harsatna eng ang pawh tawk mah ila, Pathian tanpuina kan dil tlat chuan kan chak lohna kha kan chakna a lo ni let thei a ni tih sawiin hlim takin kan inkawm a. Heti ang lam thu hi chhiar peih in lo awm ve takin, kan update ve leh ngawt a ni e.)

Kana khuaa inneihna-ah khan Lal Isua meuh pawhin Uaiin tlakchham avangin tuisik kha Zu-ah a chantir a nih kha.  Kha tih hunlai khan Zu neih loh chu mualphona a ni a. Zu in tur a awm loh avanga mualphona a ni tih a hriat avang te, Inneih chawimawina pakhat leh hlim taka lawm nan a thil-tihtheihna a lantir duh pawh a ni thei bawk. Hlimna leh Lawmna hmuna zu a tel zel ang hian, lungngaihna leh buaina thlen chhan chu Zu hi a lo ni fo bawk. Lawmna leh hlimna, mualphona thlentu a kan lo ngaih fo thin chu Zu a nih ang hian, tun thleng pawhin Zu hi nuihzatbura min siamtu chu a la ni. Hlim hlawp bawlna hmuna chengte tan pawh lungngaihna thlentu chu zu a ni tho.

Vanglai hun hmanga hlim tak leh nuam ti taka Zu zawrhna hmuna mite zaia awi thin “Dirk-a leh Tony-a” chuan mipui an awiin, an chawk hlim hle thin a nih kha. A chang chuan tuipui kama hlim hlawp hmang leh hunawl hmang thinten an sawm ngun em avangin zaiin hun an hmang thin a. An tan chuan inhlawhfakna leh inthehlarna tha taka lo ni bawk nen, nuam an ti thin hle  a ni. He mite thian dun hian an lehkhazir lai atangin an hmalam kawnga an eizawnna tur bul tanin an inzui chawt thin kha a ni a.

Kum 35 zet hlim takin Dirk Howell hian zaiin mi a chawk hlim peih a ni tih hriat hi chuan ngaihsanna leh fakna thinlung a lo lang zut zut a, a tuina hi awhna-ah lo khatin zaithiam nih ve hi a chakawm phah hial thin. Hlawhtlinna hi beidawn lohna-ah a awm thei bawk.

Tony  Brown-a chuan Lambda Chi Fraternity inah a hun tam zawk a hmang thin a. A rei hnu-ah chuan Nashville-ah kum 1982 khan a pem ta a. Taco Bell puipa leh zaia an hmatawng ber thin niin, television-a fakna hrang hrangah te zaiin a hlim thei hle  a ni. Disney, McDonalds leh Budweiser company fakmawina hlate sa-in a hun a hmang a, a buai ve hle thin.

Tony-a hi a lo lar hnu hian T. Graham Brown ti a hriat lar niin, country music hla sa thin mi lar tak a lo ni ta a. A zu hehzia chu a zai lai pawha dawhsan sira zu um chhawp reng thin tiin hriat a ni bawk.  Billboard Hot Country Songs charts-ah pawh Album sawm pathum a siam zingah hla mal 20 zet  lang pha a. A hla pathumte hian a sang ber ber nihna an hauh tawh a. Hla pariat chuang hi Top ten-a lang phaka mawiin a lo sa bawk.

Graham Brown-a’n kum 1998-a hla tha tak a sak zingah, Wine into Water hi a lar hle a. Bruce Burch-a nena he hla thluk  an siam leh an phuah hi Zu hmun atanga tal chhuah tumin Pathian a auhna hla a ni. Graham-a nun harsa tak atanga phuah a nih avangin a nunhlui hria tan chuan tuipui loh chi a ni lo a. Amah ngeiin an sa leh zel hi chu ngaihnawm a tling a. He hla lo pian chhuah dan suangtuah zui loh chi a ni lo. Zu ngawlvei dinhmun hriatchhuahtirtu hla tha tak a ni. Heti ang lam thu hi mi tam tak chuan thawnthu hriatin an lo hre fo tawh  ang a, nimahsela Brown-a nun puanchhuahna hla nge a nih a, mi dang nun a ziahna hla tih chhuidawnna pawh a tam hle a ni.

De-Addiction Centre hi a khat em em a, Seat chang lo khawpa tam ngawlvei an awm lai hian kohhran leh tlawmngai pawl, mimal leh sorkar ten Ngawlveite tan sum leh pai tha leh zung an seng nasa a. Mahse ngawivel an pung a, ngawlvei dam tawh kir leh (Relapse) an tam em em a nih hi. Tawngtaina leh mangang authawm hi hmun tin kil tinah hriat tur a awm reng a, lungngaihna leh buaina hi chhum chhah tak lo zing ang hian a inzial tup tup a ni.

Kan ramah nute an tap a, pate an rum a, chhungkua an lungngai a nih hi. Zu khap burna dan tha tak kan hmang mek a, Zu avanga chanchin lungngaihthlak leh hriat hrehawm ten kian lam an pan si lo. Buaina za-khua a thlen a, tharum thawhna leh chetsualna tam tak a thlen phah a. Kristian chhungkaw zingah kristian nundana nung lo a pung nasa em em, Pate hming hre lo an pian tam phah a, tlakranna a thlen si thini. Zu hi khap ni mah sela, zu rui hi an tlem phah chuang lo a. Zu chhe in avanga thi an tam hle thin.

Mi tam tak ten ngawilveina atanga damna an chan hi an thawhrimna leh an tumna vang chu a ni teh meuh a. Amaherawh chu, eng ang pawhin bei nasa mah sela, awmzia a neih loh chang hi a tam zawk a, tanpuitu ngaia a hun taka au thinte tan chauh damna a awm thin a ni. Graham-a pawh hian thingthi chunga mi dang tanpuina a auh hnu-ah chauh hian damna a nei a ni. Khawilam atanga tanpuina lo thleng tur nge tia suangtuahna pawh la seng ngai lo tan chuan ngawlveina hian damna a thlen ngai lovang.

Graham-a hla ang hian damdawi leh ruihhlo, zu ngawlveina hian mi pangngai pawh mi ang lovah siamin, hmuhsitawm takah a chhuah thin a ni. Retheihna khurpuiah a hnuk lut a, malsawmna pawh dawng tlak lovin a siam thin a ni. Neih sa a ti the-re a, khawlkhawm a awm thei lova, rulh leh tura bat a tipung a, chapona khurpuiah a luhtir thin a ni.

Ngawlveina ata talchhuah tum tan chuan beiseina thar a awm a. Chu beiseina chu hmana Kana khua-a tuisik pawh Uaiin a chantirtu kha a ni. Chakna reng nei thei lova siamtu; zu leh ruihhlo chuan beidawnna tam tak thlen mah se beiseina thar a awm a ni tih thinlung taka a hriat a ngai thin. Nimahsela, chak lo tak chung pawha tih tur a awm ve a, chu tumruhna chuan mahni inhnek turin a phut tlat a, mahni pawh inphat ral veka awm hi a ngai a ni.

Chuti anga awm tur chuan harsatna nasa tak a nei a ni tih a inpawm phawt loh chuan hmasawn tura bul tan dan a hriat theih loh a ni. A dawt lehah chuan Graham-a lo tawn tawh anga Pathian koh a ngai a ni. Uaiin chu tuisika chantir let leh tura ngen mai hi a tawk a ni. Chu chu hun remchang hmasa bera ngaih a ni bawk.

Chu zu ngawlvei chuan mi tam takin an tawngtaipui thin tih a hria a, amah pawh a tawngtai thin. A aiawha dilsaktute tawngtaina zozai chu dampui tham a ni tih a hria a. He indona hneh tur hian vawi tam tak tawngtaina nen alo hmachhawn tawh a. Ama chakna leh remhriatna mai chuan a hneh thei lo tih hriain Pathian tanpuina chu a dil mawlh mawlh thin.

“ You've heard a multitude of prayers on my behalf

I pray one more is not too much to ask

I've tried to fight this battle by myself

But its a war that i can't win without your help”

Kha zan chhinchhiahtlak takah khan zu ruih avangin mihring dinhmun pawha hmuhsitawm berah awmin, a aia dinhmun chhe leh tur mi an awm lo tih pawh a hria a. Hmana Isuan Tuisik Zu-a a chantir a theih chuan, a Zu ngawlveina pawh hi dam thei a ni tih hriain, a zu lo in tawh zawng zawngin a taksaa a nghawng tha lo tak takte kha, Tuisikah a chantir let leh thei a ni tih a hria a, a thingthi chungin Pathian hnenah a tlu lut tawp a nih kha.

“ So many times i've hurt the ones i love

I've pushed them to the edge of giving up

They've stood by me but how much can they stand

If i dont put this bottle in your hand”

A hmangaihte vawi tam tak a ti na a, beidawnna ruamah vawi tam tak a kaltir a. A hmangaihte vawi tam taka ding hlei thei lovin a siam tih a hria a,  Zu um nena Pathian kuta tluk luh mai loh chu tih theih a nei tawh lo a ni. A ngawlveina chuan a thinlet tawh avangin chakna reng a nei tawh lo tih hrechiangtu ber  a ni.  A zu lo intawh zawng zawngte kha Tuisika chantir let leh turin Pathian a au a. Damdawia tha tak pakhat chu tuisik a nih ang ngeiin, a taksaa zu leh a tur lo awm zawng zawngte chu Tuisika chantir let leh turin a ko mawlh mawlh ani.

Tui hi a pawimawh em em a. Khawvelah hian Vaibelchhe-leh-chhawng aia tam hian nun khawchhuah nan hmun hla taka mi tui an chawi thin a. Kawlphetha leh tuilakna remchan loh avanga tui thianghlim lo in a, harsatna nei hi an tam hle bawk. Kum 5 hnuai lam naupang 26,000 chuang hian tui thianghlim in tur an neih loh avangin kumtin an thi thin. Heng thihna te hi ven theih a ni a, a tihdamna damdawi emaw vaccine emaw khawvel thiamna a ngai lo a. Tuisik hi damdawi tha tak a nih chuan Zu tur hnathawh zawng zawngte nen lama tuisik a chantir let theih chuan chak lohna kha chakna a ni zawk dawn lo em ni?

“ I shook my fists at heaven

For all the hell that ive been through

Now I’m begging for forgiveness

And a miracle from you” …

“Could you help me turn the wine back into water”

Pathian laka kut phar chhuakin a inhumruha, a nunkawnga harsatna nasa tak a lo tawh zawng zawngte leh a dai buak zawng zawngte chhuikirin Pathian laka ngaihdamna leh thil mak dil mai loh chu tih theih a nei si lo. Thil mak a thlen loh chuan a ngawlveina hi dam mai thei a ni lo tih hrechiang tak chungin Pathian hnenah a tawngtai mawlh mawlh mai a ni. Thilmak thlentir turin a tawngtai a. A thleng ta reng a nih kha.

Ngawilveina hi a tel lo va awm theih lohna emaw a tel lo va nun theih loh a ni a. Chuti ang mite chu Dependants tiin an sawi bawk. Zu-a innghat, Zu tel lo va khawsa thei lo tihna a nih tak ber chu. Kan ramah hian Sual chi hrang hrang Corruption leh nunphung diklo, chindan tha lo (Malpractice) avanga kan ram leh hnamin a tawrhna hi a nasa hle  tawh a. Lal ban hun atanga U.T leh nimin thleng khan dik lohna hrang hrang, inthiam chawpa kan tih tam tak hi Pathian mit atanga lungdumna hmuh tur awm miah lo  a tam khawp ang. bansan theih loh bansantirtu chu Pathian  a ni.

Zawngin a ngumkhak a hmu lo va, a thiante ngumkhak a nuihzat tih ang mai hian kan ramah a langa dinhmun chhe zawk hmuhsit kan ching hle. Ruihhlo ngawlvei, hur ngawlvei, Corruption ngawlvei leh thinlung Cancer, thluaka sum lut, that ngawlvei te kan tam hle a. Mahni maia tal chhuah a theih loh chang a a awm a. Chenpuite, thawhpuite leh khawtlang, politician te nawrna avanga suala tluk luh a awl hle tih a hriat a. Chuti ang harsatna kan tawh chang chuan pan tur dik tak pan ila, mimal theihna tlin bak a awm a nih chuan mahni leh mahni indo chunga Pathian auh hi a tawk a ni.  Ani chuan Thilmak, mihringte hriatthiam phak bakin a lo thlentir mai dawn a ni.

Kan chhungrila min thununtu, kan sutkian theih loh a awm hian chakna leh theihna engmah kan nei lo a, kha thil khan min thunun tlat thin. Inchhirna leh siamthat duhna nei thin mah ila, kan sualna khan min chelh tlat a, min thunun thin a nih hi. He hla phuahtu pawh hian Zu avang leh a kaihhnawih avangin harsatna a tawk a, a zunzamin phuar bet tlat a, a zu in tawh zawng zawngte avangin hrisel loh phah mah sela a hun takah, damdawi leh tui thianghlimah a chantir tlat chuan a chakna leh hlimna hnar a lo ni si a. Min ti chhetu eng ang pawhin kan chakna hnar alo nih theih nan Lal Isua tanpui tura sawm hi a tawk a ni.  Ani chuan kan mamawhna zawnah min tanpui mai dawn tih i ring ngam ang u..

DOWNLOAD THIS LINK
http://mp3skull.com/mp3/wine_into_water.html

RIGHTENOUS AND EVIL

When I was young!  I was young?
I’d dreamed of the right path
I’d always dream of Justice  and Equality
I finally found righteousness and dark side of the evil
Righteousness is of nothing
But, in selfish manner.
Nobody cares, but God

What is Righteousness?
What do we talked about?
If we summarize all; is righteousness
But, only in a selfish manner.
Only for the fashioned we talked
Dumb and deaf can’t say a useful word
But there is also a selfish matter.

Why God let him into this beautiful world.
Why God let him interfere in this Suhana safar
Why God allowed mixing earthly and Godly things
As the scriptures say, yes is Yes, Not mixing
But the Christians, these followers mixed up everything
It’s from a materialistic and Corrupted mind
But there is a way and hope is in HIS arms

I HATE A MAN WHO MIXED THE EARTHLY AND GODLY
I HATE A MAN WHO FASHIONED CHRISTIANITY
I HATE A MAN WHO CHANGE HIS COLOUR
I HATE A MAN WHO ALWAYS IN NEUTRAL

HRUAITU THA KAN MAMAWH

(CONGRESS MNF, ZNP Hruaitu tihlam a ni lo)

Kan Ram leh Khawtlang hian hmagaihtu a mamawh a, mi tlem te chauh a nei a. Chung mite chu khawtlang ti hmasawn tur hian an tawk em em a. Nimahsela chung mi tlem te hruai tur chuan hruaitu tha a nei lo tluk a ni. Mite sawisel a tawng mai thei emaw khawltlang, veng hmusit zawnga thu awm duh lo ngawt hi a mamawh ber tawh lo. Ram leh khawtlang thatna tur duh a, pen chhuak ngam a mamawh ta. Hruaitu tha kan mamawh tak zet a ni ti pawhin a sawi theih ang chu

Hruaitu tha chuan mite nunah sawi leh tuh (influence) a nei thin a. Hruaitu tha chu mipui mamawh dan a zir a kal ngam, mipui te aiawh a ding thin. Ama duh dan aia mipui duh dan dah lal thin (democratic leader) hi kan ngai ngawih ngawih a ni. Hruaitu thau sawk thin, ama duhdan chauh dah lal (Autocratic leader) hi kan tan a tha lova. Kan sahmim tih puar a nih chuan a tawk, a bak chu a thak thakin thak rawh se tih ching (laize faire leader)hruaitu hi mi tha an awm ngai lo

A huna do nei thei, a huna tlawm leh mai thei kan mamawh a. Hriat loh hre ngam, thurawn la thiam. Mite zah kai phaka nun uluk. Midangte nun zir a, khawtlang ngaihsan khawp a thawk thin kan mamawh a ni. A thawhrimna avanga mite hnuai chhiah pawh pawi ti lo mi hi ram leh khawtlangah hian an awm lo em ni? Ram leh khawtlang tana mi ti phur thei, mi leh sa te nunphung leh duhdan te a chakna a hmang thei hruaitu kan awm em?

Thlarau lama kan hruaitu phan chang chin te hian an pian leh murna tlu sawp mek hi an hmu thei em? Kan tuar ngam dawn em? Ram chu a chhiat loh nan dai theu tur leh a hmahruaitu ni tur te kha an inkuangkuah mai dawn em ni? Khawtlang tana thil tih nei tur leh hmasawnna hmel hmuh tir in tum dawn lo em ni? Pathian ram chu mi té ber te atanga mi lian ber te len theihna a ni ang khan kan ram hian chhantu a mamawh a, puitu a ngai a, mangang aurawl chu chhang tur an awm lo em ni?? Sakhaw hruaitu te meuh pawh an inkiltawih a, hruaitu nihna an um e ngam tawh loh chuan ava beidawn thlak tawh awm ve?

Thianpa Sate El Raju-a

Keima thianpa hi “Aw thihna khawnge I tur chu?” tia kun tlawk thlawk hmelpu tur hian khawvelah a lo piang lo a. A pian leh murna hian a nunkawng a hril lova, a thlahtute nunphung lah a chhawm hek lo. Tunlai tleirawl ze pakhat ka hriatchhuah phah fo avangin a chanchin ziak lo thei lo-ah ka inngai a. Chu chuan mite nun ngaihsakna leh hmuhthiamna kawngah a pui thei ngei ang le.

A pian hlim; vahvaihna khawvel a lo dakchhuak a nih avang hian vahvaih nawn tum lo awm ang hrim hian hun a hmang a, naupang rilru thianghlim suahsualna-in a pawlh dal loh rilru ngei kha a la chhawm nun zel avangin kaihruaitu azira nun hmang chho tur a ni a. Thian kawm (peer pressure) hian a nunah awmzia a nei thui dawn tih hi a lang chiang hle  a ni.

A naupan lai hre thui lem lo mah ila, fapa duat, a nihna ang anga chhawnchhaih thin a ni tih a lang thei bawk. Khawchhak lama thingtlang khaw pakhat, pawih veng ngat atanga seilian a nih avangin a nunphung hi  a pawih rilru a ni lo a, Amah hi Pawih hnam chikhat ni awm hrima hnam tlemte zinga mi ni tura lo piang a ni. Kum 1992 khan “The Thingtlangpa Junior” ni turin a lo piang a. A pianna khua-ah hian Facebook pawh awm lo mah sela, a tan chuan khawvel dang a ngai lo emaw tih turin a hlim reng thin. Chu erawh chuan khawvel finna chhawr tura cham hlen tir a tum si lo.

A tleirawl than chhoh dan hi duhtusam a ni a, Balance diet leh thil danga hraipuar a nih zia hi a pianzia-ah a hriat theih a. A rilru erawh a thansan tih tur khawpin a thang lian chak a. Ama sawi dan chuan “A naupan lai pawha tuihawkah chauh inkhelh nuam ti mi” a nih avang hian nu leh pa duhthusam ang diak diaka seilian thei chu a ni lo ang a, a seilen mila duhthusam mai chi a ni awm e.  A lo he tih vang hian an khua-ah chuan vawk chaw fian hawlhnaa hlap zin ber pawl niin, an khaw naupang zingah mahni pate hmaa kut hnung suiha, ding zing ber a ni awm e. Tunah zawng thiamzirna avangin an khua a chhuahsan hial alo ngai ta a, pawr tawka Present Sir tih pawh a ngam ta!!! “The Thingtlangpa” chu ka ngai ber thin tih erawh a sawi cham chi thin.

A tleirawl chhuah tirha a than chak em avang hian T-Shirt thar pawh, khingkhang ruh lang thapa hak hi a ching hle a. T-Shirt Print pawh khi tuar khawpa hak hi a duhthusam a nih avana siam danglam thin a ni. A hmai pawh tukhuma nem beh thlap tum ang hrima in tuai uluk a ni lawi si. Tunlai zia hi chu amah hian a bet tlat ti ila a dik awm e. Khawhar a ngai thei lo em em a, Inchhungkhura leh thenrual zinga a awm chuan Juice no khat in sa ang hi a ni reng thei thung. Tawng hmang leh sawidan phung a neih avang hian hrethiam lo tan zawng a pawimawh nep khawp ang le.

Tleirawl tawng duh leh tawng hmang nei a nih avang hian a bula awm tam chuan nuih loh theih loh hun a awm thin a. Rilru ip-pik leh enghelh neih lai erawh chuan mahni inthiar fihlim mai hi a finthlak thin a ni. Ni za inhlawhna (MGNREGS)a a thawhchhuah ve tum pawh hian hnathawh ve an phal ngai lova, thutna nuam tak an siam sak zawk thin. A chhan chu eng dang vang ni lo vin, a kam liam an ngaihthlak duh vang a ni a. Chu aia pawimawh erawh mite fuih phurtu a ni a, hna an thawh chak phah thin a ni.

Tleirawl laia lirthei lawm nachang hria  ani a, a tirah chuan Bike, a silencer pawh zawl dang mai, a rider thutna leh a passenger thutna inchen tham khawpa seat zawlah hlimna a chhar tan a. A tlangnel chin, a thiam nal hnu chuan a phurh theih zat aia tam, a shock observer pawh chip hmawk khawpa tam phurin khawvel hi alo pal khu ve tawh a, vawi tam bawkkhupin chibai alo buk ve tawh bawk. A nunna erawh a nu tawngtai tam vang liau liaua zuaha a awm niin a sawi ve tlat thin.

Hunpui bika “pawng mawng” hmanga hlimna chhar thin khan khawvel hmasawnna avanga a thlirna tlang lo danglam ta hian “Chungmu vanlai aia Air India-a” chuan a chak tir tawh a. Hunpui bika zan lama nula tlangval intih hlim nana mi thil duhlai an zawn sawn thin emaw mi sum leh suk, tuizem, bel an lo thuhruk a, a tuk zinga harsa tak chunga an laklet thlir kha nuam a ti thei tawh lo a. Mawl lai hun khan a lo mawlzia hi hahipin a sawi thin.

Unau piangza an thuhmun thei lo a, danglam bik an awm thin an ti a. Nimahsela, nu leh pa nunphung leh chetzia hian fate nunah thu a sawi nasa em em a, a thawhdan chu a inang reng thin a. A lanchhuah dan erawh an ze milin alo langchhuak thin a ni. Nu leh pa ten, fate enkawlna kawngah hei hi hriatreng tur a ni a. Enkawlna thuhmun pek hi a finthlak ber lova, fate ze mila enkawl mai hi hlawhtlinna chu a ni tih hi a dik em em a ni.

A pa hi khawkhat parawn a ni tih a hriat theih chhan chu Kohhran leh pawl, mihringzia a chhut thiam danah hian a lang chiang a. Kohhran sawiselna emaw Pawl sawiselna emaw a ka atangin a chhuak ngai lo a. A zah em em zawk a ni. Piantharna leh chhandamna hi vei ve kher mah suh se, a hlat ngai lo. Kohhran belh hi vankaina tur pawh ni lo mahsela khawvel finna a ni tih a hrechiang a, a thlahthlam ngai lo. Chu chu nun da hlau, chawh pawlh nunah pawh chhiar kher lovin a mimal nun hmasawnna kawngah a ngaih tlat avangin kohhran a hlat ngai lo ang.

Pathian thuin engto neilo tura min hrilh hi a zawm dik hle a. Lungkham luat a nei ngai lo a. Chumi a nih vang erawh chuan a tihtur a thulh ngai bik lo. Mihringte inawiza tur kan nih ang hian bula mite hi a dah pawimawh hmasa ber thin a. Chu chu kan mamawh a ni si a.

A bulah chuan khawvel hi a thianghlim bik a, eng helh a awm thei lo a. Nun hi a nih ang angin kan hmang thei a, a hlu a ni. Materialism -  Khawvel nawmsak thlakhlelhna leh duhbelh tum luat avanga a mawi leh a dik a dawk thlu lova buaina hi a awm ve lo a. Lungngaihna leh helhkam lah a awm thei hek lo. Hei erawh tih makmawh a ni, Ha aiah Ha tih hi. I ngaihsak loh chuan chhete pawhin a ngaihsak lo ang che.

A bula I awmdawn chuan I hrisel a ngai a. Khawvel finna leh hausakna, mawina leh sanna te hi dah tha thiam la, a nuam a ni mai. Chuti ni lo va, rilru khing bai taka I awm a nih chuan nangmah leh nangmah kha I inhrem ang a, hlimna reng I hmu lo ang. I neih I ui a thiang lo a, a neih ang pawh a ui thiang lo a ni. A nunah hian a sur a sa, zanrei leh zing hian awmzia a neih loh avangin I mamawh chuan I ko eih thei reng a, hrehawm ti hmelin a awm ngai lo a, chuti ang bawka I awm ve theih erawh a ngai a ni.

A nunah hian tha lo lai pawh tam tak a awm a,   a tha lai pawh a tam hle bawk. A thil chin tha lo tak erawh taksa chul den dena hnim zauh zauh a ching hi a ni. Thutiam a hlen lo ngai lo a, hlenchhuak turin a bei tauh tauh thin. Thil pakhat chiang taka min tiam a awm a; I nupui neih hun chuan khawiah pawh awm ila, eng vang pawhin ka lo kal ang tia min tiam lai hian, ka hming chhala nula chhaih erawh a sim duh thak lo a. Ka buaina tur belhchhah zel erawh a sim chuang lo.

Hahthlak maw.... nakinah chhunzawm leh ang
https://www.facebook.com/samuelb.hriatpuia?fref=ts

 By LALREMLIANA PACHUAU

Tlakawrh Lehkhabu Fakselna/Review

Lehkhabu release na-ah hian sawm ka nih ve ngai lemloh avangin ka la kal ngai miahlo! Mahse rinloh tak maiin kan thianpa Zofa H Chhangte (Maneiha) chuan Tlakawrh (Counselling Kaihhruaina) 9th Oct, 2012 khan a release a, kal ve tura min sawm miau avangin ka va tel ve ta a, vannei ka inti ta riau mai a ni. Tin, Lunglei hmun ngeia Lehkhabu chhuah ngam an awm hi a lawmawm lehzual bawk. Chubakah he function-ah hian zaithiam emaw political figure emaw an tel miahlo kha ka lawmna tizual leh zeltu pakhat a ni bawk.

Tlakawrh (Sava hming) lehkhabu ang hi lehkhabu dang, Mizotawnga ziak a la awm ngai miahlo niin an sawi a, hei hian he lahkhabu hlutna hi a belhchhah kan tilo thei lovang. He lehkhabu hi page 127 a ni a, cheng 70 man a ni bawk. Lehkhabu kawmah hian mipa pahnih leh hmeichhe pakhat lemziak, damdawi ti thin niawm tak te pencil drawing (?) a ziah a awm a, thing khawro tak leh notice board 7 a awm bawk a, a ziaktu rilru hi hriatthiampui a har phian mai.

A chhung thute hi hmun 3-ah thendarh an ni a, Then-1 na-ah hian Counselling chungchang sawifiahna leh nihphung chi hrang hrang Thupui nei Bung-10 lai an awm a. Then-2 na-ah hian Thutawi 5 a awm leh a. Then-3 na-ah Hla Chham chi 5 an awm bawk. Thu leh hla mai nilo, thawnthu leh hla chham chi thleng thlenga a a lo inhnamhnawih hian a ziaktupa ka lo la hriatchian lohzia min hmuhchian tir a, eng ang chiahin nge kan la hnmelhriat chhoh zel dawn tih chu hunin a la rawn hril mai turah ngai ang.

Lehkhabu chhiar nuam ka tih reng reng chu a Layout hmuh nuam, mam tha leh paragraph then hrang inzat chho thin hi a ni pakhat a, chu chu he lehkhabu-ah hian felfai takin kan hmu a, nula inchei fai tak ang maia ngainatawmah a chhuah ti ila kan tisual tampui hauh lovang! Tin, Vanneihtluanga ten an uar em em, thupui neihtir hun a hre riau mai a, chu thupui atang chuan a pengkual duah lova, a hun takah a titawp thiam riau bawk. Chubakah Counselling lamah hian kan la pachhiat deuh avangin Saptawng thumal hman a ngai tam riau mai a, mahse chungte chu nalh tak maiin Mizo Tawngin a letling mam tha thei hle mai a, Sap tawng hi a thiam riau a, Zotawng hi a thiam lehzual niin a lang.

He lehkhabu ziaktupa hian a subject a hre hnehsawh hle mai a, a zira zir chhuak anih piahlamah hian atakin Counselling hi a practise thin anih loh pawn a ti thinte zingah a mikhuallo hle niin a lang tlat mai. Counselling Theory chi hrang hrang a han sawite hi a taka nunpui tawh niawm fahran hian a sawifiah thiam riau pek a, chuvang chuan hriatthiam har em em a awm tlat lo bawk a, mi naran lehkhathiam lemlo, Counselling class la thin tan pawh hriatfiah a harloh rualin mithiam tan lah chuan hnualsuat chi niin a lang hauh lo bawk.

A ziaktu hian a sawi chipchiar bawk a, ngun taka he lehkhabu chhiar zo i nih ngat chuan Counsellor tha tak i nih phah loh pawn Counselling awmzia dik tak, a tihdan tur, a phelhdarh dan tur, a sehhmeh tur, a ei tur sa leh a paih ngai lai hrim hrim chu i hre ngei ngei dawn tlat a, chu chu i tana hlawkna ropui tak a ni ngei bawk ang. Counselling neihdan tur te, awmdan tur te, chetdan tur te, tawngkam hman tur te, boruak siam danglam dan te, rilru puthmang tur te, tihtur leh tihloh tur te thlengin chiang takin tarlan a ni a, mi naran mai mai pawh ni la, Counsellor tha takah i chhuak ngei ngei ang, i duh phawt chuan.

A bik takin ruihhlo ngaite zinga thawkte tan he lehkhabu hi a tangkai lehzual mai awm mang e. A dik a dik chuan heng hmuna thawkte hi training nei hranpa em em lova thawk ve tawp mai, a thente phei chu patient atanga Counsellor-a kaichho an awm nawk mai a. A hranpaa training an nei ve thin anih pawn he lehkhabu ang em em a chipchiar hi chuan training an neih ka ring lemlo, chuvang chuan heng anga thawkte tan phei chuan he lehkhabu hi chu lei ngei ngei tur niin ka hria, a tul khawp mai.

He lehkhabu-ah hian Counselling hrang hrang a rawn sawi chipchiar hle mai a, mi tam tak chuan a awm tih pawh kan hriatlohte an ni nual mai. Christian Counselling, STI/STD Counselling, Blood Bank Counselling, ART Counselling, Community Care Center Counselling, Health leh Marriage Counselling, Abuse/Violence Counselling, Suicide Counselling, Abortion Counselling, Adoption Counselling leh Career Counselling thlengin a hawl kim hle mai a, hei hian mi chhiarzau tak leh thil chikmi tak anihna a rawn tarlang nawn leh chiang hle mai a, a awm mai mai lo tawp tih a lang reng mai. 

He lehkhabu ziaktu hi mi huaisen ve tak chu a ni phawt mai. Mi tam takin an tih leh an chenpuite hnen baka an sawirik ngamloh Kohhran kalphung diklo lai nia a hriat a rawn sawilang hmiah hmiah mai hi ka duhlai tak pakhat a ni tlat mai. Mitinin Counselling kan mamawh a, mahse Counsellor tha erawh kan vai hle thung. Chuvang tak reng a kan piantharna pawh hi kan bosal zung zung thin reng ni. Kohhran pawn nasa zawka tan a lak a ngai a, Counsellor tha ni tura Kohhran mi a buatsaih thiam pawh a pawimawh hle tih a lang chiang hle mai.

Tunah chuan Then Hnihna lo chuangkai tawh ang. Kan thiana hi a thuziak ka la chhiar miahlo mai a, mahse hei a thutawi han chhiar hian thu leh hla lamah mikhual chet-in a che leh mang tlat pek lo! A thutawi rawn tarlante hi tak tha ngel ngel tak an ni. Nautihtlak chungchang a han letling hi hre hmasa lo ila chuan a ma irawm chhuak a maw i ti ngei ngei ang. A zawhna siam pawh hi a chhang tur dik takte hian an chhang ngam ang emaw chu? Anih loh leh kohhran leh mipui aware nachang kan hriatphah ang em?

A thawnthu tawi pahnihna hi a phuahchawp nge a tak tih hriat a har leh nek mai. Tunlai hmeichhe dinhmun, a bik takin tleirawl sikul kallai nun a rawn phawrhchhuak nalh leh hle mai a. Hmangaihna lamah pawh hian a zei zek lovang tih sawi har tak a ni. Ni, hmeichhe tleirawl awmdan hi hriatthiam a har takzet a ni. Rinphakbak hian an khawsa tlat mai hi a mak a, chumai bakah an nu leh paten a heti tak maia an han thlah zalen leh an ngaihzamsan mai hi a mak ka lo ti ve em em thin a ni. Nu leh pa tan chuan chhiar ngei chi a ni.

A dawt leh ah hian Mizoram dinhmun rapthlakzia a rawn tarlang leh a. Thalai, a bikin hmeichhia ten hei hi chhiar ngei se a va tha dawn em! Sex-ah kan tlan nasa tih chu kan hre vek, mahse nau tihtlak tam ta lutuk mai leh AIDS natna darh chak ta lutuk mai hi Kristian rama thleng chi a ni ngai dawn em ni? Kan ram hi a dam mawlhlo a ni ber mai, khawilai mai pawh hi pan vei ang vek ni ta mai hian ka hre thin. Nu leh oaten an eiru a, fanu fapa ten kan lo chenral a, sualbawihah kan tang ta dul dul ni berin a lang.

A dawt leha mi Salvation Camping nge kan mamawh a Counselling tih hi inhnialna tichhuak thei tak a ni. Salvation Campnmglo hian kan piangthar thiam tawh tlat lo mai a, kohhran pawn a thlakna tha zawk tun thlengin a la hrelo chu a ni bawk si. Mahse rei daihlo, lu tihai em em tu anih tlat avangin Counselling neih a rawt ang hian kal ta ila enge kan an ang tih hriat a chakawm khawp mai.

Retheihna chungchang a ziah hi a tha leh pek hle mai. Harsatna leh manganna thlentu anihna a phochhuak thiam riau mai a, retheihna avanga miten an tihduhloh an tihfo thin nachhan pawh a sawifiah thiam khawp mai. Chuti taka buaina thlentu chu hnualsuata, umbo daih a duhna hian a mihringpuite laka a rilru puthmang dik tak a tarlang chiang hlein ka hre bawk a, a thil thlir dan ang hian thlir thiam ta theuh ila retheihna hi kan umbo thei mai ang em?

Then thumna hi chu ka ngaihven loh lampang tak a ni. Sawi tur pawh ka nei em em lo, mahse hetiang ang hlachham chi phuahchhuak ve tur hi chuan theihna ka neilo tih ka inhre chiang em em a, chu chuan ka thiana hi mi special tak a ni tih a tarlang nawn leh a ni ber mai. Thuziak mite reng reng hi mi dawihzep an awm ka hre ngai manglo, mahse han at-huai ta vak erawh an awm chuang bawk lo. Lehkhabu chhuah ngam chin erawh risk la ngam, mi huaisen dik tak an ni, chutiang mi thian a ka nei leh Lunglei thalai zingah an awm hi a lawmawm hle ani.

Lunglei ziakmi i nih chuan chan pawh huamin Lunglei-ah ngei lehkhabu release thin la, zaimi inih chuan Lunglei-ah ngei hian release function huaihawt ngam ang che. Aizawl lama va release awt awt ho hi Lunglei mipuite pawh hian hriatthiamna chin kan neih a hun tawh khawp mai. Tin, MLA ni lo, a taka i thu leh hla tuipuitu che tlangzarhna-ah sawm ngam la, mi vantlang tena an chan ve turin i theihtawp chhuah thin bawk ang che. Risk la ngamlo tan hlawhtlinna mualah ke pen ve theih a ni ngai lo. 

A tawp berah chuan, he lehkhabu tlawm tak anga lang, mahse a ruka hlu em em si, chhiar phawt loha hriatthiam theih ni si lo leh a hlutna hmuhchhuah theih si loh hi lei la, chhiar la, nunpui la, midang tan malsawmna thlentu ni ang che.