Min Veltu Naupang ka Vei
Hmeichhia kum 50 ral kai lo a ni, Lehkha a zir em tih hriat a har a, English Medium chu sawi loh Mizo Medium a luh pawh chu a tan chuan thil harsa tak a ni. Bengali Medium a lut awm a mawi niin; a khawsak phung chu a danglam bik hle. A Pasalin HIV/AIDS a kai avangin a nupui pawhin alo kai phah ta a. A pasal chuan a thihsan tawh a, Tunah hian a fate enkawl chu; chu hmeichhia kutah chuan a awm ta a ni. Aw, Electric eng luh theih lohna leh zelah pawh HIV/AIDS hrik hi alo lut thei a ni maw??
A fa ber pawh hian HIV/AIDS a vei tih hriat chian a ni a, naupang kum 7 mi velin eng natna nge a vei tih pawh a hre thiam lova, damdawi ei reng a nin thu erawh chu a sawi thin. Khabe leh Ka chhung lawng reng hi naupang chuan an ning em em a. Thenrual kawm erawh chu a bansan thei lo. Khawtlang ti ti avanga an thin hrik erawh chu nuam a ti lo tih a chetzia in a lan tir thin. Ei tha mamawh ngawih ngawiha hun hmang khan ei tur tuihnai a nei lova, a thil ei erawh a tui em em thin. Mi hausa fa leh ei tui tak tak ten Thla khat chhung tuisik ringawt pawh ring se an taksa in a chhiat pui lovanga tih tur khawpa an taksa a thau mam tawh laiin, A ni erawh hi chuan Kum hnih chhung ei tur tui hnai tinreng pawh ei ta se, a pian mawi thei dawn em ni tih tur khawp a lu lawk bir ber, biang puam leh cher ṭhi ṭhei, mit khur tla duk anih avang hian a mamawh awm chu Doctor kher lo tan pawh a hriat theih a ni.
Khawpui a sei lian chu nise ART damdawi a ei ang a, Kum 18-25 chhung pawh nun khaw nuam takin a hmang ve thei ang a, tun dinhmunah erawh an dinhmun a chau a ni. A nu leh pa thawhchhuah a inhnang fak ṭhin khan, hnathawktu PA a nei tawh lova, a nu; thiam mumal nei lo chawm atan chuan an riang unau a ni. Hei erawh a vanneihna, HIV/AIDS hi engnge a nih a, eng ang fakauva hlauhawm nge a nih a hre lo. Beiseina sang tak nen a damdawi ei ṭhin chu thawk har a ti em em ṭhin. A nun ram chuai ka hmuh hian min ti lunghnur ṭhin.
A chanchin tam tak leh chiang zawka ka sawi dawn chuan He Zoram zimte ah hian a nunkhua ka tih chhiat sak ka hlau si a. Chiang lo ruaiin kan tarlang hram a ni e. A nu chu Puitling, engkimah chhia leh ṭha hrethiam a ni tawh a. He naupang tan hi chuan khawvel hi a lem, mangphan ang ruai a ni. Nimahsela khawvel hi ala hmu pâr chuai a, hlim takin hun a la hmang thei fo. Pathian thil rel dan hi ava mak em!! Naupang pawisawi lo leh zel pawh a zuah si lo.
A nunna chu Pathian kut a ni a, a enkawltu pawh Pathian a ni. Leiah hian retheiin natna hrehawm tuar mah sela vanah Hlim takin Lal a la awi ang a, hmuhsit leh tihduhdah tuar lovin, ei tur khawp kham lo awm lovin Lalpa chu kan la fak za ang.
P.S:
Tunah zawng hmangaihnaa kuankuah turin hlate khua-ah an pem ta, eng emaw changa ka biak hian ka vanneihzia ka hre leh thin...